၂ဝဝ၇ ခုနှစ် ရွှေဝါရောင်တော်လှန်ရေး အပြီးမှာ ရေးခဲ့မိတဲ့ စာစုကလေးပါ။
စာဟောင်းကလေးပေမယ့် အမှတ်တရ ပြန်တင်လိုက်
စာဟောင်းကလေးပေမယ့် အမှတ်တရ ပြန်တင်လိုက်
-လေးစားရသော အမေမာ ပြောခဲ့ဘူးပါတယ်။
'အမေ့သား ကျမ်းမာအောင်နေ၊ အမေလဲ ကျမ်းမာအောင်နေတယ်' . . . . . တဲ့။
- အေးမြတဲ့ ဆောင်းတွင်းကာလမှာ 'ပျော်ရွှင်သော နှစ်သစ်ကူး ဖြစ်ပါစေ' ဆိုတဲ့ နွေးထွေးတဲ့ ဆုတောင်းသံကြားရတိုင်း မကြာခင်ကာလများက ပြည်တွင်းမှာ ဖြစ်ခဲ့သော အဖြစ်များက တိမ်မဲညို တွေလို ကြည်လင်နေတဲ့ အာရုံကို ပိတ်ဆို့ လာတတ်ပါတယ်။
- အမိမြန်မာ မပျော်နိုင်သေးသမျှ သားတို့ သမီးတို့လဲ ဘယ်လိုပျော်နိုင်ကြမှာလဲ။
- ပြည်တွင်းကအမေတွေကတော့ သားတွေသမီးတွေလို အင်တာနက်၊ ဝက်ဘ်ဆိုဒ်တွေနဲ့ မနီးစပ်၊ လက်ကိုင်ဖုန်းနဲ့ စာရိုက်သတင်းပို့တာတွေ မကျွမ်းဝင်တော့ ကိုယ့်ရဲ့ပတ်ဝန်းကျင် နီးနီးကလေးမှာ ဖြစ်ပျက်ခဲ့တာတွေ၊ ဖြစ်ပျက်နေတာတွေကို အသေးစိပ် သိရှိကြပုံမပေါ်ပါ။
ဒါပေမဲ့ အနှစ်လေးဆယ်ကျော်ကြာအောင် ကြားနေခဲ့ရတဲ့၊ နယ်ချဲ့တိုင်းတပါးသား တွေထက် ပိုမိုရက်စက် ကြမ်းကြုတ်တဲ့ ဗမာပြည်တွင်းထောင်တွေနဲ့ နိုင်ငံရေးနဲ့ ပတ်သက်သူတွေရဲ့ အတွင်းပုံပြင်တွေကြောင့် အိမ်ပြန်မလာတဲ့ သားတွေသမီးတွေ၊ အိမ်ကနေ လာခေါ်ထုတ်သွား ခံရတဲ့ သားတွေသမီးတွေ၊ ဘယ်ကိုရောက်လို့ ဘာတွေဖြစ်နေကြမလဲ မရဲတရဲမှန်းဆမိပါရဲ့။
- တချိန်ချိန်မှာ အိမ်က ဖုန်းမြည်သံကြောင့်ပဲ ဖြစ်ဖြစ်၊ မိတ်ဆွေကောင်းများထံမှ တဆင့်ပဲ ဖြစ်ဖြစ်၊ သားတို့သမီးတို့ သူတပါးနိုင်ငံမှာ ခိုကိုးရာမဲ့ ဒုက္ခသည်များ ဖြစ်သွားကြပြီ ကြားရရင် အမေတို့ ပိုပြီး ဝမ်းသာရမှာလား။ သခင်မျိုးရယ်လို့ လက်မထောင် ရင်ကော့ ဝင့်ကြွားခဲ့တဲ့ အဘိုးတို့ အဘွားတို့သာ ရှိခဲ့ရင် အမေ့ကို အပြစ်တင်ကြမှာလား။
ဘယ်သူဘာပြောပြော တိုင်းတပါးကဒုက္ခသည်စခန်းဟာ ပြည်တွင်းက ဥပဒေမဲ့ ထောင်တွေရဲ့ ငရဲခန်းတွေထက်စာရင် အနှိပ်စက်ခံရမှု လွတ်မှာပါ။ အနေအစား ဆင်းရဲတာခဏဖယ်ထား၊ တစိမ်းနယ်မှာ မျက်နှာငယ်ရပေမဲ့ သားတို့သမီးတို့ တဖက်သတ် အကြောင်းမဲ့ ညှင်းပန်း မခံရရင် အမေနည်းနည်းတော့ ဘဝင်ကျမှာပါ။
လူမသိသူမသိ ညဉ့်အမှောင်ထဲပျောက်ကွယ်သွားပြီး အသံမကြား သတင်းမကြား ပြန်မတွေ့ရတော့တာထက်စာရင် အမေ့ကလေးတွေ ပြည်ပမှာ ဒုက္ခသည် ဖြစ်ရတာ တော်ပါသေးရဲ့၊ အများကြီးကံကောင်းသေးရဲ့၊ အမေကြံဖန်ပြီး စိတ်ကို ဖြေသိမ့်ရမှာလား။
- ပြည်တွင်းမှာ အခြေခံလူ့အခွင့်အရေး အပြည့်အဝရရှိရေး၊ ကုန်ဈေးနှုန်း ကျဆင်းရေး အတွက်လှုပ်ရှားကြိုးပန်း နေကြတဲ့ အဖွဲ့အစည်းတွေရဲ့ အများပြည်သူအတွက် လုပ်ဆောင်ချက်တွေ အပေါ် ရရှိတဲ့ ရလဒ်တွေကို ကမ္ဘာ့ကွန်ယက် စာမျက်နှာတွေမှာ မြင်ရတဲ့ ဓါတ်ပုံတွေ၊ ဖတ်ရတဲ့အကျိုးဆက် တွေက မြင်ရကြားရတာ ရင်ထဲမှာ မသက်သာ စရာချည်းပါပဲ။
- ချောင်းရေစပ်စပ်မှာ သင်္ကန်းတပိုင်းတစနဲ့ မှောက်ရက် ပျံလွန်တော်မူနေတဲ့ သံဃာတော် တပါး။ ကိုယ်ထည်မှာ ဒဏ်ရာနည်းနည်းပါးပါး အညိုစွဲတာပဲရှိပေမဲ့ ဦးခေါင်း အနောက် ဘက်မှာ ညိုမဲနေတာက ခေါင်းကိုပဲ ပစ်မှတ်ထား သဲသဲမဲမဲ အရိုက်ခံခဲ့ရတယ် ဆိုတာ သက်သေပြနေပါရဲ့။ မျက်နှာတော်ကို မဖူးရလို့ ဘယ်သူဘယ်ဝါ ဘွဲ့တော် မဖေါ်နိုင်ကြ ပေမယ့် သားဦးပဉ္စင်း ပျောက်နေတဲ့ ပြည်တွင်းက မယ်တော်အားလုံးအတွက်ကတော့ မျက်နှာကို မမြင်ရတာ၊ အမည် မဖေါ်နိုင်တာပဲ ကောင်းပါတယ်လို့ ကိုယ်ချင်းစာတွေးမိပါရဲ့။
- တံခါးဘောင်အပျက်ပေါ်မှာတင်ပြီး ဘေးက စာနာသူတွေလား၊ သူငယ်ချင်းတွေလား၊ တဖက်တချက် ဆွဲတင်ပြေးလာတာ ခံရတဲ့လူငယ်လေးတဦး။ အလွန်ဆုံးရှိလှမှ အသက်နှစ်ဆယ် အစောပိုင်းပေါ့။ နုနုနယ်နယ်သူ့မျက်နှာလေးမှာ ပါးစပ်ကိုကန့်လန့်ဖြတ် သွေးသံရဲရဲ ဒဏ်ရာကြီးက - သေနပ်ကျည်ဆန် ဖြတ်မှန်တာလား၊ တခုခုနဲ့ ဖြတ် အရိုက်ခံရပြီး ကွဲသွားတဲ့ ဒဏ်ရာလား။
အသက်ပဲ လွန်ပြီလား၊ သေငယ်ဇောနဲ့ မျောနေတာလား။ မသေခင် သူ့စိတ်ထဲမှာ သူ့အမေကို သတိ ရနေမလား။ အမေကရော သူ့သားလေးကို ဒီလိုအဖြစ်မျိုး ကြုံရလိမ့်မယ် ဘယ်ထင်ပါ့မလဲ။ ဒီလိုပုံပန်း ဘယ် ကြည့်ရက်ပါ့မလဲ။ ရင်ထဲ ကြေကွဲမိပါရဲ့။
- သတင်းဓါတ်ပုံတွေမှာ မကြောက်မရွံ့ ရှေ့တန်းက ဦးဆောင်နေကြတဲ့ လူငယ်လေးတွေ၊ မားမား မတ်မတ် ရှေ့မှာရပ်နေခဲ့ကြတဲ့ ဦးပဉ္စင်းတွေ၊ ကိုရင်လေးတွေ၊ ဆယ်ကျော်သက် လူငယ်လေးတွေ နဲ့ အမျိုးသမီးလေးတွေရဲ့ ပုံတွေကို ကြည့်ပြီး သူတို့တတွေ အခုဘယ်မှာလဲ မရဲတရဲ တွေးကြည့်မိပါတယ်။
အဖမ်းခံရတဲ့ စာရင်း၊ အသတ်ခံရတဲ့ သတင်းတွေနဲ့ ညဉ့်နက်သန်ကောင် မီးခိုးတလူလူ မတိတ်တဲ့ မီးသဂြိုလ်စက် အကြောင်းတွေ ကြားရတော့ သတင်း ဓါတ်ပုံကလေးတွေ ပြန်ကြည့်ပြီး သူတို့လေးတွေ ဘယ်စာရင်းမှာ ပါမလဲ၊ ဆက် မတွေးရဲတော့ဘူး။
နောက်ဆုံးတော့ သူတို့လေးတွေ အဖမ်းခံရတဲ့စာရင်းထဲက နာမည်နှစ်ထောင် ကျော်မှာ ပါ ပါစေ ဆုတောင်းပေးမိပါတယ်။ ဖမ်းပြီး အနှိပ်စက်ခံ ရတာက တနေ့မှာ သူတို့လေးတွေ အမေနဲ့ ပြန်တွေ့လမ်း ရှိနိုင်တယ် မဟုတ်လား။ မဝန့်မရဲ ဖြစ်စေချင်တဲ့ နောက်ဆုံးဆန္ဒလေး တခုပါ။
- အင်တာဗျူးတခုမှာ ဖတ်ခဲ့ဘူးပါတယ်။ ပြည်သူ့ဆန္ဒကို ကိုယ်စားပြု တောင်းဆို ခဲ့မိလို့ အထိမ်းသိမ်းခံ ထားရတဲ့ လူငယ်(ကျောင်းသား)ခေါင်းဆောင်တဦးရဲ့မိခင် (ကိုအံ့ဘွယ်ကျော်၏ မိခင် ဒေါ်တင်တင်ဝင်း) က သူမရဲ့သား အချုပ်အနှောင် ခံရတာနဲ့ ပတ်သက်ပြီး ပြောသွားတဲ့ စကား၊ အင်မတန် နက်နဲတဲ့ မိခင်မေတ္တာ စကားတခွန်းပါ။
“ကိုယ့်သားလေး အဖမ်းခံရတယ်ဆိုတော့ အမေတယောက်အနေနဲ့ ရင်ထဲ မချိဘူး ပေါ့။ ဒါပေမဲ့ ကိုယ်မလုပ်နိုင်တဲ့ ကိစ္စကို ဒီကလေးတွေက လုပ်ပြသွားတာ ဂုဏ်ယူ ပါတယ်” ဆိုတာ။
- ဘေးကထိုင်ပြီး ဝေဖန်ရေးနဲ့ လေကန်ရေး လုပ်နေကြသူများဆီက ကြားနေရတဲ့ စကားတွေ နားထဲ မဆန့်ပါဘူး။
လုပ်နေကြတာ ဘယ်နှစ်ခါ ရှိပြီလဲ . . .
လုပ်နေခဲ့တာ ဘယ်နှစ်နှစ် ရှိပြီလဲ . . .
လုပ်နေသမျှ ဘာဖြစ်လာလို့လဲ . . .
ဘာလို့ ဒါတွေဆက်လုပ်နေကြတာလဲ . . . ဆိုတာတွေ။
သွားပါများခရီးရောက် . . . တဲ့၊ ရှေးရိုးဆိုစကား ရှိပါတယ်။
တစတစနဲ့ နှဲ့ရင် ကျောက်ဆောင်ကျောက်သားတောင် ပဲ့နိုင်သေးတာပဲ။
တနေ့တလံ ပုဂံဘယ်ပြေးမလဲ ဆိုတဲ့စကား မမေ့ကြပါနဲ့။
အဓိက ကတော့ ညီညွတ်ခြင်းသည် ခွန်အားပါပဲ။
- ငယ်ငယ်က အဖေပြောခဲ့ဘူးတဲ့ စကားတခု မှတ်မိပါတယ်။
စွန့်စားရဲရင်၊ အကြံဥာဏ်ကောင်းရှိရင် ရှေ့ကနေ ဦးဆောင်သွား။
မဟုတ်လို့ကတော့ နောက်က အသာလိုက် . . . တဲ့။
ဘေးကနေပြီးတော့ လိုက် ကန့်လန့်မတိုက်နဲ့ . . တဲ့။
အတူ လက်မတွဲပဲ ကန့်လန့် လိုက်တိုက်နေသူတွေထက် စာရင် ဘေးထိုင်နေသူတွေက ပိုသာလေမလား၊ မရဲတရဲ တိတ်တခိုးအတွေးလေး ဝေဟင်မှာ လွင့်မျောသွားလေရဲ့။
- နှစ်ကုန်တော့မယ် အမေ။
ဒီတနှစ် အမေ့မွေးနေ့က ပြီးသွားပါပြီ။
နောင်နှစ်ခါအတွက် သမီး ကြိုပြီး ဆုတောင်းပေးပါတယ်။
အမေလည်း ကျမ်းမာအောင် နေပါ။
အမေ့သားတွေလည်း ကျမ်းမာမှာပါ။
အမေ့သမီးတွေလည်း ကျမ်းမာပါတယ်။
(ပြည်တွင်းပြည်ပရှိ ပြည်သူ့သားကောင်းသမီးကောင်း အားလုံးရဲ့ မိခင်များသို့)
လေးစားလျက်
မာလုစံ
ဝ၂-၁၁-၂ဝဝ၈
No comments:
Post a Comment