(မဟေသီ ရုပ်စုံမဂ္ဂဇင်း၊ ၁၉၈၅ခု စက်တင်ဘာလ၊ အမှတ် ၁၄)
၁၉၈၅ ခုနှစ် စက်တင်ဘာလ ထုတ်၊ မဟေသီ မဂ္ဂဇင်း၊ အမှတ် ၁၄ တွင် ပါရှိခဲ့သော စာမူလေးအား ပြန်လည် တွေ့ရှိခြင်း အမှတ်တရ။
၁၉၈၅ ခုနှစ် စက်တင်ဘာလ ထုတ်၊ မဟေသီ မဂ္ဂဇင်း၊ အမှတ် ၁၄ တွင် ပါရှိခဲ့သော စာမူလေးအား ပြန်လည် တွေ့ရှိခြင်း အမှတ်တရ။
ရပ်ဝေးကို စွန့်ခွာသွားသူ၏ စာမူပါမဂ္ဂဇင်း အချို့ကို နှစ်အစိပ်ကျော်အောင် မပျောက်မရှ ထိန်းသိမ်းထား ပေးခဲ့သော
ချစ်မိခင် စောမြ၀တီနှင့် ချစ်ညီမငယ်လေး ယုကိစံ အား အထူး ကျေးဇူး တင်ရှိပါကြောင်း။
ချစ်မိခင် စောမြ၀တီနှင့် ချစ်ညီမငယ်လေး ယုကိစံ အား အထူး ကျေးဇူး တင်ရှိပါကြောင်း။
ညက အိပ်မက် မက်သည်။ တရေးနိုး ညဉ့်အလယ် မှောင်မည်းမည်းမှာ တယောက်တည်း ပြုံး မိရသေးသည်။ ချက်ချင်း ပြန်အိပ်လျှင် မေ့သွားမည် စိုး၍ မက်ခဲ့သော အိပ်မက်ကို အစမှ အဆုံး သုံး လေး ခေါက် ပြန် စဉ်းစားရသည်။
မဖြစ်နိုင်သော အိပ်မက်မို့ သူများတွေ ကြားလျှင် ရယ်ပွဲ ဖွဲ့ကြမည်မှာ အမှန်ပင်။ ဒါပေမယ့် ဖြစ် စေချင်သော အကြောင်းမို့ မိမိဘာသာ တွေးပြီး ကျေနပ်မိရသည်။
အိပ်မက်အကြောင်း မပြောခင် ပြောချင်တာလေးတွေ အလျင် စလိုက်ရအောင်လား။
- - + - - + - -
လွန်ခဲ့သော နှစ်များစွာ (ဆယ်နှစ်ကျော်ကာလ) မြန်မာနိုင်ငံမှာ စတီရီယိုဂီတ ခေတ်ဦးပိုင်းဟု ခေါ်ရမည့် ၇၀ ခုနှစ် အစပိုင်း အချိန်များက ဖြစ်ပါသည်။ ထိုစဉ်က သီချင်း စ နားထောင်တတ် ကာစ အသက် ဆယ်နှစ်ပတ်ဝန်းကျင် ကလေးအရွယ် ကျွန်မတို့မှာ ယနေ့ခေတ် ကလေး များလို လှိုင်းသစ် ဂီတမှာ ယစ်မူး ခဲ့ဘူးပါသည်။
မြန်မာ့သီချင်းဂီတဟူသည် အမျိုးမျိုး ရှိပါသည်။ သီချင်းကြီး၊ ပတ်ပျိုး၊ ဘောလယ် ဆိုတာတွေ။ မြန်မာသံ စစ်စစ်၊ ကျေးလက်တေး အပြင် အနှစ် နှစ်ဆယ်တေး၊ ကာလပေါ် တေး သီချင်းများ။ မြန်မာ့ အသံမှ ခေတ်ပေါ်တေးဂီတ နှင့် မြူးကြွကြွ ရုပ်ရှင်သီချင်းများ။
သည်လို အသွင် ကွဲပြားသော လက်ရှိ တေးဂီတလိုင်း များစွာအပြင် စတီရီယို ဟု ခေါ်သော ဂီတလိုင်းသစ် တလိုင်းကို ထိုအချိန်က လူငယ်တွေ အောင်မြင်စွာ လမ်းခင်းနိုင် ခဲ့ကြသည်။ နိုင်ငံခြား တေးသီချင်း သံစဉ်အတိုင်း သင့်လျော်သော စာသားများ ထည့်၊ တချို့က တိုက်ရိုက် ဘာသာပြန်သည် လည်း ရှိသည်။ သံစဉ်ဂီတကိုတော့ မူရင်းသီချင်းနှင့် တသံတည်း ရအောင် တီးခတ်ပြီး သီဆို ကြသော သီချင်းများ စတီရီယိုလိုင်းမှာ အများဆုံး ပါဝင်ပါသည်။
အမှန်ကို ၀န်ခံရလျှင် ဂီတအကြောင်းကို နားထောင်ရုံသက်သက်ကလွဲပြီး ကျွန်မ ကျွမ်းကျင်သူ မဟုတ်ပါ။ နားထောင် ကောင်းသည်၊ မကောင်းသည် ပြောတတ်ရုံက လွဲပြီး ဒိုရေ မီဖာ ကို အမြီး အမောက် တည့်အောင် ရွတ်တတ်သူမဟုတ်။
ဒါပေမယ့် စတီရီယိုခေတ်ဦးက အဆိုတော်အတော်များများကို အားပေးခဲ့ဘူးပါသည်။ လက်ချိုး ရေနိုင်သော ခေတ်ဦး အဆိုတော်များမှ တယောက်စ နှစ်ယောက်စက လွဲလျှင် ကျန်သူများ ကို လူငယ် အတော် များများ၊ အားလုံးနီးပါးက လက်ခံခဲ့ကြသည်။
လူကြီးတွေကတော့ တီးမှုတ်သံတွေ ဆူလွန်းသည်၊ ဆိုသံ မပီမသမို့လို့ ဘာတွေ ဆို နေမှန်း မသိရ၊ ဗမာလို ဆိုတဲ့ သီချင်း ဗမာ နားမလည်ဘူး၊ ဘာညာ ကွိကွနှင့် အပြစ် ဆိုကြသေးသည်။
ထားပါတော့လေ။ ကျွန်မ ရေးချင်တာက စတီရီယိုလောက ဂီတ လေ့လာရေးစာတမ်း မဟုတ်လို့ လူတိုင်း သိပြီးတဲ့ ဒီအကြောင်းတွေ မပြောတော့ပါဘူး။ ကျွန်မပြောချင်တာက စတီရီယို ခေတ်ဦးက အဆိုတော် တယောက်ရဲ့ သီချင်းကလေး တပုဒ် အကြောင်းပါ။
အဆိုတော်က လူတိုင်း သိပြီးတဲ့၊ သိကြတဲ့ နာမည်ကြီး မင်းမင်းလတ်။
သူ သီဆိုခဲ့သော သီချင်းများ အားလုံးနီးပါး ယခုထိတိုင် ကျွန်မတို့၏ ရင်ထဲ စွဲနေဆဲ ဖြစ်သည်။ နောက်လူတွေ ဘယ်လို ပြန်ဆို ဆို၊ သူ့ ဆိုဟန်နှင့်သူ ကောင်းကြပေမယ့် မင်းမင်းလတ်၏ ဆိုဟန်က ယခုထက်တိုင် နားထဲမှ မထွက်နိုင်သေးသည် အထိ ဖမ်းစားနိုင်ခဲ့သူ တယောက် ဖြစ်သည်။
ကော်ပီသံစဉ်တွေ သီဆိုပေမယ့် သီချင်းဖြစ်လျှင် ပြီးစတမ်း၊ စာသားထည့် သီဆိုခဲ့သူ မဟုတ်။ ယနေ့တိုင် နာမည်ကြီးကြဆဲ ဖြစ်သည့် သူ၏ သီချင်းရေးဆရာများကလည်း လက်စွမ်း ထက်ခဲ့ကြသည် မို့ ဆယ်စုနှစ် တနှစ် ကျော်သည်အထိ သူ့သီချင်းများ မရိုးနိုင်သေး ဟု ထင်ပါ သည်။
အဖွဲ့အနွဲ့ မလွန်ကျူးပဲ ရိုးရိုးလေး သီကုံးထားသော မင်းမင်းလတ် ၏ နာမည်ကျော် သီချင်း များထဲမှ သီချင်းကလေး တပုဒ်ကဖြင့် ... ...
‘စာအုပ်ထဲမှာ သင်တဲ့၊ မယ်သီတာခိုးတာ ဘယ်သူလဲ၊
သူငယ်ချင်း ငယ်ရည်းစားက မေးတယ်။
ဒီလိုပါ မောင့်ချစ်တဲ့ ချစ်သူမေရယ်၊ ဒဿဂီရိ ဘီလူးတဲ့ကွယ်။
ရည်းစားများများ ထားတဲ့သူကို၊ ဒဿဘီလူးနဲ့ တူသလို မျက်နှာများကြတာကို ဆိုသတဲ့။
စဉ်းစဉ်းစားစား တွေးကြည့်ပါကွယ်၊ ဒဿမင်းနဲ့ တူမယ်၊ မျက်နှာ မများနဲ့နော်ကွယ်။
ဒီလို မဖြစ်ပါစေနဲ့၊ ဒီလို မဖြစ်အောင် နေကွဲ့၊
သူငယ်ချင်း ငယ်ရည်းစားလေးရယ်။
လိမ္မာပါ၊ နောက်တယောက်လည်း မချစ်စေချင်တယ်၊ သစ္စာတွေ မဖျက်နဲ့ကွယ်။’
(စာသားမှားခြင်း၊ ကျန်ခြင်းများ ရှိပါက ခွင့်လွှတ်ပါရန်)
ဒီသီချင်းလေးတွင် သူငယ်ချင်း ငယ်ရည်းစားရယ်လို့ စာဖွဲ့ထားသဖြင့် သူငယ်ချင်း ဘ၀မှ
တဆင့် တက်လာသော ချစ်သူများ ပေပဲပေါ့။ ဒီတော့ သမီးရည်းစားအချစ်တွင် ဖြူစင်သော ငါးရာ နှစ်ဆယ့်ရှစ် ရောစွက်သည်မို့ သူ၏ ချစ်သူလေးကို မည်မျှ စေတနာထား ချစ်မည်ကို ယောက်ျားလေး ဘက်မှ ခံစား ကြည့်နိုင်ပါသည်။
တဆင့် တက်လာသော ချစ်သူများ ပေပဲပေါ့။ ဒီတော့ သမီးရည်းစားအချစ်တွင် ဖြူစင်သော ငါးရာ နှစ်ဆယ့်ရှစ် ရောစွက်သည်မို့ သူ၏ ချစ်သူလေးကို မည်မျှ စေတနာထား ချစ်မည်ကို ယောက်ျားလေး ဘက်မှ ခံစား ကြည့်နိုင်ပါသည်။
ချစ်သူလေးကို ရည်းစားမများဘို့ရာ ဒဿဂီရိဘီလူးနှင့် တူမည်ဟု သတိပေး ပြောထားသည်။
ငယ်ငယ်ကတည်းက ဒဿဂီရိအကြောင်းကို ကျွန်မတို့ ထပ်တရာတေအောင် ကြားဖူးခဲ့ပြီး ဖြစ်သည်။
သူများချစ်သူကို ၀င်လုလျှင် ဒဿဂီရိ၊
သူများချစ်ခြင်းကို ခွဲသူသည် ဒဿဂီရိ၊
ရည်းစားများတဲ့ သူကို ဆိုလည်း ဒဿဂီရိ ပါပဲ
ဒီလို နာမည်ဆိုးတွေ အတပ်ခံရတဲ့ အကြားမှာမှ ဒဿဂီရိ ဆိုတာ လူမဟုတ်ဘူးတဲ့။ ဘီလူးတဲ့။
ဘီလူးမှ ရိုးရိုးဘီလူးတောင် မဟုတ်ပါဘူး။ ခေါင်းဆယ်လုံး ပါသတဲ့။
ဒီတော့ အော့နှလုံး နာစရာ မျက်နှာ အများကြီးနဲ့ ကြောက်စရာ ဒီကြာကူရီ မင်းသားကြီးကို အသည်းထဲ စွဲနေအောင် မှတ်မိခဲ့ ကြတာပေါ့ရှင်။
ဒါက လွန်ခဲ့တဲ့ (၁၉၇၀) ဆယ်စုနှစ် များ မှ ခံစားမှု။
- - + - - + - -
ကုန်လွန်ခဲ့သော ၇၀ခုနှစ် ဆယ်စုနှစ်ထဲ အနှောင်းပိုင်းများမှ ၈၀ခုနှစ် အလယ်ပိုင်းများ တွင် စာပေလောကမှာလည်း မထင်မှတ်သော အပြောင်းအလဲတွေ ဖြစ်ခဲ့ပါသည်။
စာရေးဆရာတွေ မှိုလို ပေါက်လာသည်။ စာအုပ်လောက ဖေါင်းပွလာသည်။ လုံးချင်းဝတ္ထု စာအုပ်ဈေးတွေ မိုးထိအောင် လှေကားထောင် နေကြချိန်မှာ ရုပ်ပြကာတွန်းလောက က တဟုန်တိုး ရှေ့သို့ ချီတက် သွားသည်။ ကာတွန်းစာအုပ်တွေ ဟော တအုပ်၊ ဟော တအုပ် လှိမ့် ထွက်လာချိန် မှာ လုံးချင်းရေး ဆရာတွေမှာတော့ ၀တ္ထု စာအုပ် တအုပ် ထုတ်နိုင်ဘို့ စာမျက်နှာ သုံးရာ အနည်းဆုံး ရအောင် ကုန်းရုန်း ရေးကြရတုန်း။
သည်အချိန်မှာ ဆန်အိုးထဲ ဆန်ဖြည့်နိုင်ဘို့ ရှဲဒိုးစာရေးဆရာ အလွှာတခု ပေါ်လာသည်။
တဗိုလ်တက်ဆင်း ထွက်လာကြသော ကလောင်ရှင်တွေထဲတွင် အတွေးရဲသူ၊ အရေးရဲသူ တွေ၊ ဆန်းသစ်သူတွေ တချို့ နာမည် ကျန်ရစ်ခဲ့သည်။
အချို့ အချို့သော ဆရာကြီးတွေ ဝေဖန်နေကြသလို အကျိုးပြုစာပေ၊ အဆိပ် အတောက် စာပေ ဆိုတာကိုတော့ ကျွန်မ ခွဲ မပြောတော့ပါဘူး။ ပါဝင် ဝေဖန် ရလောက်အောင် လည်း ကျွန်မ အဆင့် မမီပါဘူး။ အဆိပ်အတောက်ပဲ ဖြစ်ဖြစ်၊ အကျိုးပဲ ပြုပြု၊ အဆိုးအကောင်း ဘယ်လိုပဲ အဝေဖန် ခံရပါစေ လက်ခံ အားပေးသူ အထိုက်အလျောက် ရှိခဲ့၊ ပရိသတ် အတော် အတန်ရခဲ့လို့ နာမည် တလုံး ရခဲ့သော စာရေးဆရာများ ရှိခဲ့ပါသည်။
စာပေ လေ့လာ လိုက်စားသူမဟုတ်ပဲ သာမန် စာဖတ်သူတွေ အတွက်ကတော့ စိတ်ဝင်စား စရာ ကောင်းသော၊ အရေးအသား ကောင်းသော စာအုပ်ဆိုလျှင် ဖတ်ကြ၊ ကြိုက်ကြ၊ အားပေးကြ တာချည်းပါပဲ။ လူငယ်ထု အကြားမှာ လူကြိုက်များ၊ အရောင်းသွက်သော စာအုပ်များမှ ကောက်နှုတ် ပြောရမည် ဆိုလျှင် -
ဥပမာ ... ... ဆရာ မင်းသိင်္ခ ဆိုလျှင် သူရေးသောလိုင်း (ကျွန်မ အမည် မတပ်တတ်ပါ) တွင် ထိပ်ဆုံးက ကျွန်တော် ဖြစ်နေဆဲ ဖြစ်သည်။ သူလို စာမျိုးတွေ ရေးသားသူတွေ ရှိလာ ပေမယ့် သူ၏ နေရာ ကို ဘယ်သူမှ မယူနိုင်ကြ။
နွမ်ဂျာသိုင်း ဆိုလျှင်လည်း သူလိုပုံစံ ဆင်တူယိုးမှား ရေးသူများစွာထဲမှာ ရှေ့တိုးထွက် လာ ပြီး ယခု အချိန်ထိ အရှေ့ဆုံးမှာ နေရာရဆဲ ဖြစ်သည်။
ဆရာငြိမ်းကျော် ကတော့ အထူး ပြောစရာ မလိုပြီ။ အများပြည်သူတွေ သိကြတဲ့ အတိုင်း ပါပဲ။ အသွင် ကွဲပြားသော ဆရာ၏ရေးဟန်က အနည်းငယ် လေးသလို ရှိပေမယ့် အရေးအသား ပိုင် သူမို့ ထို လေးသလိုလို ရေးဟန်ကပင် စာဖတ်သူကို ဆွဲခေါ်သွားသည်မှာ မြန်မာစကားပြေ စာအုပ် ထက် ထူလိုသော သူ၏၀တ္ထုကြီး ဆုံးကာမှပင် သက်ပြင်းလည်းချ၊ စာအုပ်လည်း ချနိုင်ကြသူတွေ မနည်းပေ။
ဒီနေရာမှာ နာမည်မဖေါ်ပြပေမယ့် ဒီဆရာတွေလို နာမည်တလုံး ရသွားသူ အခြား ကလောင် ရှင်တွေ အများကြီး ရှိပါသေးသည်။
(မှတ်ချက် ... တက္ကသိုလ်ဘုန်းနိုင်၊ သိန်းသန်းထွန်း၊ ခင်နှင်းယု၊ ဂျာနယ်ကျော် မမလေး နှင့် တကွ လွန်ခဲ့သော ဆယ်စုနှစ် မတိုင်မီကတည်းက နာမည်ရပြီးသော၊ ပရိသာတ် ရှိပြီးသော ၀ါရင့် ကလောင်အို ဆရာကြီး၊ ဆရာမကြီး များမှအပ နာမည်ရစ ပြုလာသူများ၊ လူသိ များ လာသော ကလောင်သစ်၊ ကလောင်ဟောင်း များကို ဆိုလိုပါသည်။)
ထို များလှစွာသော ကျား၊ မ၊ ကလောင်ရှင်များ၊ သီးခြားပေါ်ထွက်လာသော ၀တ္ထု နောက်ခံ၊ ရေးဟန် လိုင်းများထဲမှ ဒီနေရာတွင် ကျွန်မ ရွေးချယ် ပြောလိုသူက ဆရာချစ်ဦးညို ဖြစ်ပါသည်။
ဆရာ ချစ်ဦးညိုသည် တမူ ထူးခြားစွာ လိုင်းနှစ်လိုင်းမှာ တချိန်တည်း တပြိုင်တည်း အောင်မြင်ခဲ့သည်။ ရာဇ၀င်နောက်ခံ ၀တ္ထုများနှင့် ဇာတ်သဘင် လောက အခြေခံဝတ္ထုများ ဖြစ်သည်။ ထိုအချိန်က ဆရာ၏ စာရေးသက် မည်မျှရှိပြီ၊ ဘယ်လိုစာတွေ ရေးနေသည် မသိခဲ့ တာကတော့ ကျွန်မနှင့် ကျွန်မလို လူငယ်အများစုရဲ့ စာပေဆိုင်ရာ လေ့လာမှု ချို့ယွင်းချက် ဖြစ်ကောင်း ဖြစ်ပါလိမ့် မည်။ ဒါ ပေမယ့် သည်အချိန်မှာ ရာဇ၀င်နောက်ခံ ၀တ္ထုများနှင့်အတူ ရုတ်တရက် လူငယ်ထု အကြား ဆရာ့ကို လူသိ များလာခဲ့ပါသည်။
ရာဇ၀င်နောက်ခံ ၀တ္ထုများ ရေးသားရာတွင် လူတိုင်း သိပြီး၊ ကြားပြီး ဖြစ်သော ရာဇ၀င် ဇာတ်လမ်း များကို ပြန်လည် ရေးသားခဲ့သည် ဖြစ်ပေမယ့် ဆရာ့စာတွေမှာ ဆန်းသစ်မှုတခုကို သတိ ပြုခဲ့မိသည်။ ဒါကတော့ လူတိုင်းသိပြီး၊ မှတ်မိပြီးသော အဓိက ဇာတ်ကောင်တွေကို ဘေးမှ ၀န်းပြီး ဇာတ်ရန်ကို ရှေ့တန်းတင် ရေးတတ်ပုံလေးပင် ဖြစ်သည်။
ရှေးရိုးစဉ်လာ ဇာတ်ရန်များကို အဓိက ဇာတ်ကောင်နေရာ ပို့လိုက်သောအခါ လူတိုင်း သိ
ပြီးသော၊ အထူးသဖြင့် ဇာတ်သိမ်းကို သိပြီးသော ဇာတ်လမ်းလေးများသည် အမြင်တမျိုးနှင့် ဆန်းသစ် လာရသည်။ ဇာတ်ရန်၏ နေရာမှ ၀င်ကြည့်ရ၍ စာဖတ်သူတွေမှာ ခံစားမှု အသစ် တွေ ခံစားလာရသည်။ ဒီတော့ ဇာတ်သိမ်းကို သိပြီးပါလျက်နှင့် ဒီဇာတ်ကို အသစ်အဆန်းလုပ် စိတ်ဝင်စား ခဲ့သူတွေ မရေ မတွက်နိုင် ဖြစ်ခဲ့ရသည်။
ပြီးသော၊ အထူးသဖြင့် ဇာတ်သိမ်းကို သိပြီးသော ဇာတ်လမ်းလေးများသည် အမြင်တမျိုးနှင့် ဆန်းသစ် လာရသည်။ ဇာတ်ရန်၏ နေရာမှ ၀င်ကြည့်ရ၍ စာဖတ်သူတွေမှာ ခံစားမှု အသစ် တွေ ခံစားလာရသည်။ ဒီတော့ ဇာတ်သိမ်းကို သိပြီးပါလျက်နှင့် ဒီဇာတ်ကို အသစ်အဆန်းလုပ် စိတ်ဝင်စား ခဲ့သူတွေ မရေ မတွက်နိုင် ဖြစ်ခဲ့ရသည်။
စင်ပေါ်တက်ပြီး သရုပ်ဆောင်ပြတာမျိုးသာဆိုလျှင် လက်ဝါးနှစ်ဘက်စလုံး သွေးခြေဥ ကုန် အောင် လက်ခုတ်တီး သြဘာပေးချင်စိတ်မျိုး ပေါ်မိသည်အထိ စွဲလမ်းမိခဲ့သည်က ဆရာ ချစ်ဦးညို၏ ဇာတ်လမ်းများ ဖြစ်ပါသည်။
စာတမျက်နှာကို ဖတ်၍ဆုံးသွားလျှင် နောက်တမျက်နှာ မကူးမိသေးပဲ ၊ ဖတ်ပြီးခဲ့သော စာမျက်နှာကို တခေါက် ပြန်ကျော့ရုံနှင့် အားမရ၊ နှစ်ခေါက်သုံးခေါက် ထပ်ပြန်တလဲလဲ ဖတ်မိသည် အထိ ဖမ်းစားခဲ့သည်က ဆရာချစ်ဦးညို၏ အရေးအသားများ ဖြစ်သည်။
စာပေလောက၏ ဤဆယ်စုနှစ် အတွင်းမှာ စာအုပ်ဈေးများ အဆမတန် ကြီးမြင့်လွန်း၍ စာအုပ် အဌားဆိုင်မှ စာအုပ်တအုပ်ကို တရက်လျှင် အငှားဖတ်ခ တစ်ကျပ်နှင့် တရက်အတွင်း အပြီး ဌားဖတ်လေ့ ရှိခဲ့ရာမှ စိတ်ကို မထိန်းနိုင်တော့ပဲ ဘတ်ဂျက် အပွန်းခံပြီး တအုပ်ကို နှစ်ဆယ်ကျပ်နှင့် အထက်ပေးကာ အပိုင်ဝယ်၊ အမြတ်တနိုး သိမ်းခဲ့မိသည်က ဆရာချစ်ဦးညို၏ ၀တ္ထုများ ဖြစ်ပါသည်။
အားလုံးကျော်ကြားသော ဆရာ၏ ရာဇ၀င်နောက်ခံ ၀တ္ထုများ အထဲမှာမှ သည်နေရာတွင် ကျွန်မ ကောက်နှုတ် ပြောချင်သည်က နာမည်ကျော် “လင်္ကာဒီပ ချစ်သူ” ၀တ္ထု ဖြစ်သည်။
ဆယ်ကျော်သက် အတွေးထဲမှာတုန်းက မင်းမင်းလတ်ရဲ့ သီချင်းနဲ့ မှတ်ထားခဲ့မိတဲ့ ဘီလူး ဆိုတဲ့ အရုပ်ဆိုးဆိုး ဗီလိန်ကြီးကို အခု နှစ်ဆယ်ကျော် အသက်ပိုင်းမှာ ဆရာ့ဝတ္ထု ဖတ်ယင်း ပုံဖော် ကြည့်မိတော့ အမြင်က တမျိုး ဖြစ်နေသည်။
လင်္ကာဒီပတိုင်းမှ အသားမည်းပြီး ခန္ဓာကိုယ်ထွားကြိုင်းသူ လူမျိုးများမို့ ကျွန်မတို့ ဇာတ်လိုက် ကျော် ရာမ၊ သီတာတို့လို အသားဝါလူမျိုး၊ အရွယ်လတ်များနှင့် ယှဉ်လိုက်သော် ကိုဒဿတို့ အသွင် က တမျိုးကြီး ဖြစ်နေမှာပေါ့လေ။
ထားပါတော့။ ကျွန်မ ပြောချင်သည်က ဒဿဂီရိ ချောသလား၊ လှသလား မဟုတ် ပါဘူး။ သူ့ဘ၀ အကြောင်းပါ။
ဆယ်ကျော်သက် အရွယ်ငယ်စဉ်က ကိုယ်တိုင်ပဲ အသိဥာဏ် နည်းပါးလွန်းသေး၍ ထင် သည်။ ဒဿဂီရိအပေါ် မြင်ခဲ့သည်က သူသည် တကယ့် လူဆိုး၊ ဗီလိန်၊ ကြာကူရီ။ သူ့ အကြောင်းကို ဂဂဏဏ မသိသေးသော်လည်း သိချင်စိတ် မရှိခဲ့။ သိလည်း မသိချင်။ သိဘို့ မလိုဘူး ထင်ပြီး အပေါ်ယံ အမြင်နဲ့ သူ့ကို တဘက်သတ် တံဆိပ်တပ်ခဲ့သည်။ သူသည် လူဆိုး လို့။
ယခု နှစ်ဆယ်ကျော် အသက်ပိုင်းမှာဖြင့် နည်းနည်း စဉ်းစားတတ်လာပြီ။ ကိုယ်ချင်းစာတရား ဟူသည်ကို ခံစားတတ်လာပြီ။ ဒိအပြင် ဆရာချစ်ဦးညိုကလည်း အမြင်သစ်တမျိုးနဲ့ မီးမောင်းထိုးပြ တော့ ဒဿဂီရိ ကိုတောင် သနားမိသလိုလို ... ။
ဟိုတုန်းကတော့ ကိုယ်က မချစ်တဲ့သူ၊ မေတ္တာမထားနိုင်ပဲ မုန်းတဲ့သူဆိုယင် အချဉ် ပါပဲ။ သူတို့ ဘာပဲ ဖြစ်နေဖြစ်နေ နည်းနည်းမှ ဂရုမစိုက်ခဲ့ပါ။ လူသားတယောက်ရယ်လို့ သူတပါး ခံစားချက် ကို စာနာစိတ် တရားဟူသည် ရင်ထဲမှာ စိုးစဉ်းမျှ မရှိခဲ့။ စိတ်ထဲမှာ ထင်ခဲ့သည်က မိမိ ချစ်သောသူ သည် မိမိကို ချစ်မှာပဲ။ ကိုယ်ချစ် ဆိုတာ တွေ့မှာပဲ။ နှစ်ဦး နှစ်ဘက် ချစ်ကြလျှင် ချစ်သူချင်း ဖူးစာ ဆုံမှာပဲ ဟု ထင်ခဲ့မိသည်ကိုး။
အခုတော့ ဘ၀မှာ အတွေ့အကြုံလေးတွေလည်း တော်တော်တန်တန် ရှိခဲ့ပြီ ဖြစ်သည်။ အသွား အပြန် ရှိသော မေတ္တာမျိုးကို ပိုင်ဆိုင်ရဖို့။ ဒီလို မေတ္တာရှိသူချင်း ပေါင်းဖက် ကြဘို့ဟူသည် အတော် ခဲယဉ်းသော ကိစ္စမျိုး ဆိုတာ သိခဲ့ပြီလေ။
ဒီနေရာမှာ နှလုံးသားသက်သက် အမြင်ကို ကျွန်မ ပြောလိုရင်းပါ။ ဦးနှောက်က တွက်ချက်ပြီး ချစ်လိုက်စမ်း ဆိုတဲ့ အသည်းနှလုံးကို ငွေသေတ္တာထဲ ထည့်သင်္ဂြိုဟ်ပြီး အတင်းလုပ် ယူ ချစ်ရတဲ့ မေတ္တာမျိုးတွေ မပါ ပါဘူး။
ဒီတော့ ဒဿဂီရိတို့ ခေတ်ကတည်းက ဒီလိုမျိုး အဖြစ်တွေ ရှိခဲ့ပါကလား။
အုံ့ပုန်းချစ် ... ချစ်ရတာ။ မိမိက အချစ်တွေ ပေးဝေပါလျက် တဘက်က လက်မခံတာ၊ သူက ဘယ်လောက် ချစ် ချစ်၊ ကိုယ့်ဘက်က ဘယ်လိုမှ မေတ္တာ ပြန် မမျှနိုင်တာ။
ဒါတွေဟာ လုပ်ယူ ဖန်တီးလို့ မရပဲ ခေတ်အဆက်ဆက် လူသားတွေရဲ့ ရင်မှာ အလိုလို တည်ရှိ လာတာတွေ ပါလားလို့ သိခဲ့ရသည်နှင့်အမျှ ဒဿဂီရိ၏ ဘ၀ကို စာနာမိလာသည်။ ဟိုစဉ်က သူ့အပေါ် အထင်အမြင် လွဲမှားမိခဲ့သမျှ သနားလာသည်။ သူလည်းလေ လောကီသားပေမို့ ချစ်သူကို ပိုင်ဆိုင်ချင် မှာပဲ စာနာမိလာသည်။
ချစ်သူအပေါ် သစ္စာရှိလွန်းသော မယ်သီတာကို လေးစားမိသလို၊ မယ်သီတာလေး အပေါ် သံသယ ရှိရကောင်းလားလို့ ရာမကိုပင် ငြူစူမိရသည်။
ဇာတ်သိမ်းခန်းမှာ မျက်ရည်ကျလုမတတ် ခံစားရသည့် အထိ ဆရာချစ်ဦးညို အရေး အသား ကောင်းခဲ့သည်မို့ ကိုဒဿတင် မကသေး၊ မစူဠာသုဘဒ္ဒါပါ ဒီနှစ်ဆယ်ရာစုမှာ ဗီလိန် ဘ၀များက ကျွတ်လွတ် သွားကြရသည်။
အပြစ် မမြင်ကြတော့ပါဘူး။ အချစ်အတွက် သူတို့မှာလည်း သည်းရင်နင့်မျှ ခံစားခဲ့ ကြရ သည်ပဲ မဟုတ်လား။
- - + - - + - -
ပြီးခဲ့သောညက ရုပ်မြင်သံကြား တေးဂီတ အစီအစဉ်တွင် အကော်ဒီယံအုန်းကျော်၏ သီချင်း တပုဒ် လာသည်။
‘အချစ်ရှုံးသမား ဒဿဂီရိ’ ... တဲ့။
အလဲ့ ... ဘယ်ဆိုးလို့လဲ။ တို့ မင်းသားကြီးက စတား ဖြစ်နေပါရောလား။
စတီရီယိုလောကမှာ အဆိုတော် မေဆွိကို နာမည်တလုံးရအောင် တင်ပေးခဲ့တဲ့ သီချင်းတွေ ထဲမှာ ‘ဒဿလို မိန်းမ’ သီချင်းက ထိပ်ဆုံးက ပါခဲ့ပါသတဲ့။
နောက် ... ဟိုရုပ်ရှင် ရှိသေးသည်။ ‘ဒဿဂီရိ အသည်း’ တဲ့။
ဆရာ ချစ်ဦးညို သူ၏ကလောင်ဖျားနှင့် ပြောင်းပြန်လှန်ပေးလိုက်၍ နှစ်ဆယ်ရာစုတွင် ဒဿဂီရိ စူပါစတား ဖြစ်နေလေပြီ။
ယခင်က နှစ်ပေါင်းထောင်ကျော် လူဆိုး၊ လူကြမ်း၊ ဗီလိန်၊ လူယုတ်မာ ဘ၀မှ ၀တ္ထု တအုပ် ထည်းနှင့် ထိပ်တန်းမင်းသား ဘ၀ရောက်အောင် တင်ပေးခဲ့သော ဆရာချစ်ဦးညိုကို ကျေးဇူးတင်ဖို့ မကောင်းပေဘူးလား။
အခုတော့လည်း လူတိုင်းဟာ ဒဿဂီရိ ဘက်ကချည်းပါပဲ။
အသက်သာ အသေခံမယ်၊ လူ အပါမခံဘူးရယ်လို့ ချစ်သူအပေါ် သစ္စာကြီးခဲ့တဲ့ မယ်သီတာ လေး။ ကံကောင်းလို့ မချစ် မနှစ်သက်သူ လက်က လွတ်ခဲ့ရတာကို ဘယ်ဣတ်္ထိယ တွေကမှ အခု သတိမပြုမိကြ တော့သလိုပဲ။
ချစ်သူအတွက် အသက်ပင် သေသေ၊ အသေအကြေ ပြန် တိုက်ယူခဲ့ရတဲ့၊ ကံကောင်းလို့ အသက်လည်း မဆုံး၊ ချစ်သူလည်း မရှုံး ခဲ့ရတဲ့ ကိုရာမလည်း ကံနိမ့်တဲ့ အချိန်မို့ ထင်ပါရဲ့။ ခေါင်း ဆောင် မင်းသား ဘ၀ကနေ ဇာတ်ရန် ဖြစ်နေရပါပြီ။
ဘယ်သူတွေ ဘာပြောပြော ဒီအချိန်မှာ ကိုဒဿတို့ ဇာတာ စန်းလဂ် တက်နေချိန်မို့ ဂီတနယ်၊ စာပေ လောက၊ ရုပ်ရှင်ပိတ်ကား သာမက ဇာတ်သဘင် စင်မြင့်ပေါ်အထိ အနုပညာ နယ်ပယ်တ၀ှန်းမှာ အောင်လံထူ ဒဿဂီရိ ပွဲ ဖြစ်ဆဲပါပဲ။
- - + - + - -
အော် - ဒါနဲ့ ညက အိပ်မက် ပြောရဦးမယ်။
အိပ်မက်ထဲမှာ ဒဿဂီရိနဲ့ တွေ့တယ်။ သူ့ကို တခါမှ မမြင်ဖူးပေမယ့် သူမှန်း ကျွန်မ သိနေ တယ်။ ဘာလို့ဆို ပန်းချီဝသုန်ဆွဲတဲ့ ရုပ်ပြ စာအုပ်ထဲက ဒဿဂီရိနဲ့ တပုံစံထည်း ကိုး။ ၀တ်တာ စားတာက အစ၊ ဖိနပ်အထိ အကုန်တူတယ်။ ပြီးတော့ မျက်နှာပေါက်ကလည်း အလင်္ကာ ကျော်စွာ ရွှေမန်း ဦးတင်မောင်ရဲ့ သားအလတ် ကိုဝင်းဗိုလ်ရဲ့ မျက်နှာမျိုး။
သူက တစုံတယောက်ကို သဲသဲမဲမဲ လိုက် ရှာနေတယ်။
ဘယ်သူ့ကို ရှာနေတာလဲ ဆိုတော့ ဆရာ ချစ်ဦးညို တဲ့။
ဒါနဲ့ ကျွန်မကပဲ 'ဆရာ ဟိုမှာလေ' လို့ ညွှန်ပြ လိုက်ရတယ်။
တကယ်တော့ ဆရာ ချစ်ဦးညိုကို ကျွန်မ တခါမှ မမြင်ဖူးပါဘူး၊ ဓါတ်ပုံတောင် မတွေ့ ဖူးဘူး။ ဒါပေမယ့် ကျွန်မစိတ်ထဲမှာ အလိုလို သိနေတယ်။ စာပေအရ လေးစားခဲ့ရတဲ့ ဆရာ့ကို တခါမှ မတွေ့ဖူး ပေမယ့် ဆရာမှန်း ကျွန်မ သိနေတယ်။
ကျွန်မရဲ့ အိပ်မက်ထဲမှာ ... ဆရာဟာ ယောင်္ကျားပီပီသသ ခန့်ချောချောတဲ့ ရုပ်ရည်မျိုး၊ တည်တည် ခန့်ခန့်ကြီး၊ သန်မာကျစ်လစ်တဲ့ ကိုယ်လုံးကိုယ်ပေါက်နဲ့။ စာရေးဆရာ ဆိုတော့ ကချင်လွယ်အိတ် အပြာလေးလည်း လွယ်လို့။
ဒဿဂီရိက ဆရာ့အနား သွားပြီး တရိုတသေ လက်ကလေး နောက်ပစ်လို့ စကားပြော နေတယ်။
ကျေးဇူးတင်ကြောင်း ... ပြောနေမှာပေါ့။
ဆရာက ခေါင်းတညိတ်ညိတ်နဲ့ နားထောင်နေရာက ဒဿဂီရိနောက်ကို လိုက်သွား တယ်။ သူတို့ စစ်ရထားပေါ် တက်ကြမယ့် ဟန်ပြင်တော့ ... ဘယ်သွားကြမှာလဲ ဆိုတာ သိ ချင်လာတယ်။ အဲဒီအချိန်မှာ ဘယ်ကမှန်း မသိပဲ စကားသံ တသံ လွင့်လာတယ်။
‘လင်္ကာဒီပက ဆရာ့ကို ဂုဏ်ပြုတဲ့ပွဲမှာ စာပေ ဟောပြောမလို့’ တဲ့။
စစ်ရထား စ အထွက်မှာ ကျွန်မ ရုတ်တရက် အော်လိုက်မိတယ်။
‘ဆရာ ဆက်ဆက် ပြန်လာနော် …’
ကျွန်မ အော် ပြောတာကို ဆရာ ကြားမှ ကြားရဲ့လား မသိဘူး။
တကယ်တော့ ကျွန်မ အစိုးရိမ် ပိုမိတာပါ။ ဆရာ ပြန်မလာလို့ကော ဖြစ်မှာတဲ့လား။ နှစ်ဆယ်ရာစုမှာ ဆရာ ထမ်းဆောင်ရမယ့် စာပေတာဝန်တွေ အများကြီး ရှိသေးတယ်ဆိုတာ ဆရာ သိ နားလည်ပြီးသား ဖြစ်မှာပါလေ ... ။
လေးစားစွာဖြင့်-
မာလုစံ (သဘာဝသိပံ္ပ)
No comments:
Post a Comment